Happycloud

مذكراتي ( مذكرات جامعية )

Posted on الجمعة، 23 ديسمبر 2016

السلام عليكم ورحمة الله وبركـــآتــه

ويــآ هلا ومرحبـــآبكم في عالمي الثاني .. عالم المدونـــآت والذ كريـــآت الجملية اللي انطبع في حيـــآتنـــآ .. وبيمر الأيـــآم وبيبقى هالصفحة مجرد ذكرى سطرته على مدونتي

أتمنى لكم قراه ممتعة ...

التاريخ :18/12/16

هالتدوينة بداية كتابته بيوم الاحد ... يالسه أسوي برزنتيشن بعرضه ان شاء الله تعالى يوم الأربعاء وبيى في بالي لازم أكتب مذكرة للذكرى ... خاصة ان هالاسبوع أسبوع فيه نوع من الضغط في الجامعه من تسليم الاسايمنت وربورت التخرج وتقديم برزنتيشن

اليوم الأحد 18/12/2016

بداية هالاسبوع كان عندنا أمتحان فاينل لاب ... ربي سهل علينا الحمدلله ،، الحمدلله ما كان فيه صعوبة بس كان يبغيله تركيز ... صحيح ان هالفصل اخر فصل لي ،، بس فيني خوووف خوووف .. خووووف ،، وما بيدي شي غير أني مفوضة أمري لله تعالى ...

وايد أشياء صارت هالفصل ... قايله أني بكتب تدوينـــآت عشان أخليهم للذكرى ،، بس اللي صار العكس .. مـــآ كتبت ولا تدوينة ،، مدري شو ياني فجـــآه .. ولا صــآر لي خلق للتدوينــــآت ،،، يمكن بسبب الضغط أو بسبب حالتي النفسية في النهاية ما بيدي أقول شي غير الحمدلله .. وربي بيعوضني خير أن شاء الله في أيامي المقبلة ،، هذي هيه ثقتي بالله تعالى .

وهاليوم كنت يالسة فالجامعه وقلت بخلص شغلي وبرجع البيت مــآبي أسوي شي فالبيت أبي أرتاح استرخي ... بس اللي صار العكس ههههه لان يوم الأحد ضغط الابات ومافي لاب فاضي ... الا الساعه 12 – 2 بس هالوقت كان اللاب فاضي فقلت أروح البيت وأرتاح وأنـــآم وبعدين بكمل البرزنتيشن ... وتو يالسه أسوي البرزنتيشن وكتبت يومي بأختصار والحمدلله رب العالمين على كل يوم ياتي وعائلتي بعافية ونحن بعافية " الحمدلله رب العالمين "

اليوم الأثنين 19/12/2016

مـــآ بين قلق امتحـــآنات الفاينل وتسليم مشروع التخرج أقول الله يسهلها علينا يا رب ،،،

باكر تسليم الريبورت مدري ليش ما مطمنة ان الريبورت صح .. أحس أن فيه شي غلط ومن غير كذا عندي تسليم أسايمنت باكر ويالسه أكمله وأبغي أشيك على الريبورت مالنا بس أبي ريبورت يكون صح مـــآني محصلتنه والحينه صارلي ساعه بس أنتظر حد يطرشلي ريبورت صح عشان اشيك على مالنـــآآ بس محد راضي يعبرني ههههههه. فالنهايه مــآ بيدي شي غير أني أقول ربي يسهلها علينا يا رب.

وطبعا أحلى خبر وصلني اليوم أن ربيعتي ربت ويابت بنتوته وربي يجعلها من مواليد السعاده ويجعلها بارة لوالديهـــآآ ...

اليوم الثلاثاء 20/12/2016

اليـــوم عندي أوف ومـــآ روحت الجــــآمعه على أساس أيلس فالبيت وأشوف أمي وأبوي ربي يحفظهم لي يا رب ،، لان بــــآآجر بيسافرون || اللي صار العكس ،، يلست فالبيت وطرشت لي ربيعتي أني أخلص شغله لمشروع التخرج وأطرشه للدكتور ،، ومن غير هذا كله .. كــــآآن عندي تسليم أسايمنت ومــــآآ عـــآرفه كيف أطلع نسبة الكوبي من الموقع ولين مـــآ خلصت شغل الريبورت وعرفت كيف أسلم الأسايمنت وأطلع نسبة الكوبي وأطرشة صارت الســـآعه 11 ومــآ مداني أني ايلس مع الغـــآليه ،،، قبل كل الأحداث اللي صارت زين وحيت أتريق ( الحمدلله )

شفت جروب صديقـــآت العمر وانصدم أن ربيعتي اللي ولدت أمس تعبانه وفيهــآ نزيف وبنوتتها طلع عندهـــآ نقص أوكسجين ( ربي يشافيهم ويعافيهم يـــآ رب ) ... خبر حزني لانهـــآآ من صديقـــآتي المقربات لي اللي مع بعض من أول مـــآ دخلنـــآ الجامعه مــآ بيدي شي غير أني أدعي لهــآ بالشفاء ...

وشوي في جروب المشروع يحتشرون عشـــآن الريبورت وأنـــآ سحبت عليهم لووووووول وفي جروب ثاني للمشروع بس الدكتور المسوول عنه معـــآنــــآآ يصدمنـــآآ بتقديم المشروع والبرزنتيشن على الأسبوع الياااي يوم الأثنين " اللهم سهل علينــــآ مــــآ تبقى مـــن دراستي " ...... اللهم آمين

اليوم الأربعاء 21/12/2016

اليوم الصباح أمي وأبوي راحو العمرة ... ربي يتقبل منهم يا رب ويرجعون لنا بالسلامه ... ربي يحفظهم في سفرهم هذا يـــــآ رب ....

هاليوم قدمنــــآ أنــــآ وربيعتي البرزنتيشن ... مــــآ أعرف المس كم بتعطينــــآ على تقديمنـــــآآ ... فيني محاتاه وآآآيد خايفة ...

والحمدلله في هذا اليوم تم تشغيل البرنامج وخلصنا البرنامج اللي يالسين نشتغل عليه من شهر 2 ... وخلصنـــآه وربي يوفقنـــآ في تقديمة على الأسبوع الياي ... أن شاء الله نقدمه بشكل يرضي الجميع ونحصل عليه درجــــآت عــــآليه بــآذن الله تعالى

اليوم الخميس 22/12/2016

الخميس الونيس اللي كل الناس تحبه لووووول ... ويكنـــــــد ^_^

اليوم طبعا خلصنـــآآ أغلب الأشياء في الجامعه وسويت البرزنتيشن وعطيته لزميلتي تشيك عليه ووزعنـــــآآ السليدات لتقديم البروجكت على الأسبوع الياي ان شاء الله ...

يالله لحظة لطـــآلمــــآ أنتظرنهــــآآ .. مـــآ بقى شي على التخرج ربي لك الحمد والشكر وربي بيسرلنـــآ أمورنــــآ القادمة على خير ويسهل علينا مــآ تبقى من دراستي ... آمين يا رب العالمين

مثل ما تشوفن ... التدوينة عبارة عن أحداث صارت خلال هالاسبوع سطرته هنـــآ في عالمي للذكرى ... أشوفكم على خير ان شاء الله تعالى

ولا تنسونــــآآ من دعواتكم الطيبة ...

happycloudworld

0 Comments

In مواقع

موقع للفتاوي

Posted on الجمعة، 16 ديسمبر 2016

السلام عليكم ورحمة الله وبركاته

يسعد الله أوقاتكم بكل خير وبركة وطاعة الله تعالى

في كثير من الأوقات نكون جاهلين شي في الدين ،، خاصة نحن البنات نسوي أشياء فهي بالاساس محرمة وأحيانـــآآ نجهل اشياء المفروض نكون عارفينه وعارفين حكمه ...

حبيت أنزل هالتدوينة للاستفاده مع الاحكـــآم اللي نكون جاهلينه أو ما نعرفه

سبحانك ربي مــآ أعظمك ...

هالموقع عبارة عن سوال وجواب ..

السوال يكون بشي في حياتنا اليومية مثل نحن البنـــآت نحف أو ننمص حواجنـــآ وهالشي معروف أن حرام أو تنظيف الحواجب >>> أنــــآ هالشي سامعه عنه أنه عاادي يجوز واليوم تفاجات أنه حرام ... ومع دليل من السنة ...

الموهم شوفو الموقع واستفيدو منه ومن الأحكام اللي نجهله وهالموقع تحت اشراف الشيخ محمد صالح المنجد ... >>> هالشيخ أنـــآ وايد احب أشوف برامجه واستفيد من برامجه ،،، على فكرة ما كنت أعرف انه عنده موقع أو شي بس اليوم كنت يالسه أدور على حكم على شغله ودشيت الموقع ويوم فكرت أكتب لكم تدوينة شفت اسمه ودورت عليه وتفاجات انه هو الشيخ اللي أحب أشوف برامجه

الموقع عبارة عن عده لغات .. يعني أي جنسية يستخدمه من العربي والجرمني والفرنسي والتركي .....

الــــخ

الموقع ( موقع الأسلام سوال وجواب )

وهذا قسم الخاص ب المراةالمسلمة

الموضوع اللي كنت ادور عليه (وضع صور النساء في المنتديات النسائية لتعلم المكياج والزينة )

تدوينة مفيدة وسريعه ..

وهالتدوينة بيكون لي مرجع ان شاء الله تعالى

خذو لفه على الموقع واستفيدو من الاشياء اللي تجهلونة ..

ف نهاية التدوينة

لا تنسونا من دعواتكم الطيبة

واستودعتكم الله الذي لا تضيع ودائعه

happycloudworld

0 Comments

In Purchases Skin Care

مشترياتي الأخيرة وتجاربي مع بعض المنتجات

Posted on الثلاثاء، 22 نوفمبر 2016

السلام عليكم ورحمة الله وبركاته

أهلــآ أهلـــآ يا متابعيني ،،، راجعه لكم بقوة هاليومين لوووول مع تدوينة ثانية >>> شوي نعوض عن الفترة الماضية لووول

" اللهم صل وسلم على رسول الله "

تدوينتي اليوم للبنات الحلوات اللي يحبون يتشرون ويجربون منتجـــآت نفسي يعني ^_*

هالمنتجات اشتريتهم قبل يومين ،، المفروض التدوينة أنزله أمس بس صورته ومــآ مداني أعدل الصور وأكتب التدوينة فكتبت تدوينة ثانية ^_*

@ بسم الله الذي لا يضر مع أسمه شي في الارض ولا في السماء وهو السميع العليم @

بسم الله نبدء

( كريمات وزيت )

♦ أخذت كريم جونسن هالكريم وآآآآيد أحبة من يخلص لازم اشتريه من زمـــآن زمـــآن استخدمه شفت عليه عرض هالمرة وأخذته بالعادة أخذ العلبة المتوسطة والعرض هالمرة تــآخذين الكبير والثاني مجانــآآ

♦ كريم بالمرز بتركيبة زبدة الكاكاو >>> صدق ريحته كاكاو لووول ،، مرة كتبت لكم ف الانستقرام أني أبي أجربه وهالمرة أخذته عشان أجربه عندي خطوط أبيض لاني بين فترة وفترة أضعف فجاه وهالمرة أخذته

♦ زيت الجلسرين >>> لازم يكون عندي أحب أستخدمه لخلطاتي اللي ما تخلص لووول . واللي حابه تقرا عن فوايد زيت الجلسرين تدخل على ( هالتدوينة )

( صوابين )

♦ لايف بوي >>> صديقي الصدوق ما أستغني عنه مهمــآ جربت صوابين بس هالصابون لازم لازم يكون عندي خــآصه الاخضر ومجربة كل الأنواع بس هذا غير بالنسبة لي ريحته حلوة خاصه الصبــآح تحسين بـ انتعاش بسبب ريحته ههههه

♦ صابونة الكبريت >> كل ما أروح اشوفه هالمرة أخذته مــآ أعرف شو فايدته بس كذا هوسه تجربة أخذته بقرا عنه قبل ما استخدمه

♦ صابونة الكركم >>> هالصابون نظافة نظافة نظافة بشكل مــآ تتصورينه أنصحج تستخدمينه خـــآصه مع مــآي ورد 0_0 وأمس سويت لي خلطه صابونية خلصت نص العلبة خلال يومين بكتب لكم تدوينة ثانية ان شاء الله عن الخلطه اللي سويته وحبيته

( مجموعة الشعر )

♦ بلسم من الفيف لوريال أحب أستخدم البلسم والشامبو مناسبني الحمدلله

♦ بديل الزيت المعالج >>> أول مرة أشتريه وحبيته ،، ريحته حلوة وقلل من تساقط شعري بس بعدني بجربة عشان أعطيه حقه فالتجربة والاستخدام بس كمبدء حبيته من أول أستخدام

( مجموعة للمنطقة الحساسة )

♦ الغسول >>> ريحته حلوة وانتعاش ونظافة ،، كتبت من قبل موضوع عن منتجات بجربها من ضمن المنتجات كـــآن هالغسول اللي حابة تطل على تدوينة منتجات بجربهــآ ] من هنــــآآ [ ،،، حبيته أكثر من كيرف ولــآ أفكر أغيره 0_0

♦ شفرات من فينوس وسبقت وتكلمت عن تجربتي مع أمواس فينوس (هنــآآ ) كنت بس أستخدم الشفرات الوردية بس مــآ كنت أحصله بعض الأحيان فاضطريت أني أغيرة ورسيت على اللون البنفسجي هو حلو وفي كمية من الجل نفس اللون الوردي

♦ كريم سودو كريم >>> أستخدمة لترطيب المنطقة الحساسة وأحب أستخدمه مع زيت اللوز الحلو ،،، وأحيــآنــآ أذا ظهرت لي حبة أخلي عليه سودو كريم عشان يشيل الحبة ،، وياني فترة أستخدمه مع زيت اللوز الحلو لوجهي وخففي من البقع في الويهه وأحيانا استخدمه بعد ما أشيل شعر ويهي ،، هــو أمن مــآ منه ضرر ،، صح أن قوامه ثقيل بس وايد حلو وهالكريم من الاساسيات لازم يكون عندي مالي غني عنه مهما كــآن

( المقشرات )

♦ هالمقشر نايتشرز بونتي ثاني مرة أشتريه حلو بنفس جودة ستفيرز بالنسبة لي ،، حبيباته مــآ خشنة وفي تدوينة كاتبه عنه من قبل عن مشترياتي من المقشرات ( هنـــآآ )

♦ وقفاز التدليك أخذته لانه خشن أبي أستخدمه للمقشرات وأول مرة أشتريه

( معجون الاسنان )

♦ سنسوداين بس خليته عشان حبيت تصويرة لووووول

( قطن )

♦ كلاسك قطن >>> حبيته أكثر من جونسن تعرفون شو المميز فيه أن مهمها تخلين فيه تونر أو أي شي وتخلينه على ويهج كل التونر يكون ع ويهج يعني ما يمسكه بعكس جونسن عشان كذا أحب أستخدمه ( عسى بس فهمتو قصدي لوووول )

يالله تعبت من الكتابه لوووول

فالنهاية لا تنسونـــآ من دعواتكم الطيبة

@الحمدلله ثم الحمدلله حتى يبلغ الحمدلله مبتغاه @

أشوفكم على خير

فمان الله