السلام عليكم ورحمه الله وبركاته
يسعد الله أوقاتكم بكل خير وبركة وطاعه الله تعالى
( اللهم صل وسلم على رسول الله )
" بسم الله الذي لا يضر مع أسمه شي في الأرض ولا في السماء وهو السميع العليم "
يا هلا ومرحبـــآآ صديقاتي الجميلات اللي ينتظرون تدويناتي ^_^
والسموحه تاخرت على تنزيل هالتدوينة لاني عن جد جد حدي مشغوله هالفترة
تدوينتي هالمرة بيكون عن أخر سفرة سافرته الحمدلله رب العالمين إلــى باكو الجميلة بــ أذربيجــآن
1/1/2018 بفضل ربي تم الحجز للسفر إلى أذربيجــآن وسفرتنا كان بتاريخ 26/1/2018 يعني أخر الشهر ،،
أخترنــآ الروحه عن طريق فلاي دبي ،، لأن مافي طيران تروح إلى أذربيجان الا قليلة مثل العربية والاتحاد وفلاي دبي ممكن تشيكون على حسب بلادكم .. فنحن أخترنا فلاي دبي لان دبي قريبة لنا ،، والشي الثاني اذا فكرنا نروح عن طريق مطار مسقط فلازم ننزل ترانزليت عشان كذا أخترنا طيران فلاي دبي واقلاعنا كان من دبي ،،
كانت مدة الرحلة تقريبا 3 ساعات ،،، وأول ما وصلنا كان مطر وجوهم وايد حلوو ،، بس بردهم يقتل هههه يعني وايد وايد برد ويدخل في العظم فما قدرنا أول الأيام نتحمل بردهم بس بعدين تعود أجسامنا عليه ... والشي الحلو ان توقيتهم نفس توقيتنا ما أخترب نظام نومنا ^_^ يعني اذا كان معانا الساعه 8 الصبح هنــآك الساعه 8 الصباح ^_^ ،،، والشي اللي واجهناه فيه انهم ما يفهون أنجليزي الا قلة قليلة كانو يفهون انجليزي اما البقية ف بصعوبه نفهم من عندهم لغتهم او يفهون علينا ،، والشي الثاني ما حبيته فيه الشحاتين كان بكثر كثيرة في أي مكان تمشينه بس من يشوفون الشرطة يمشون عادي ^_* ما كانهم ماذينا ولا شي ،، وحبيت شعبهم شعب راقي ،، ما يبخلون على روحوهم بشي بشوشين ،، هذا انطباعي البسيط عنهم واللي أستكشفته خلال فترة تواجدي في باكو .
واللي كان حاجز لنا الفندق ومرتب لنا هالرحلة شخص اسمه أسماعيل الله يذكره بالخير ،، هو اللي استقبلنا في المطار وودعنا ورتب لنا الفنادق والاماكن اللي نروحله وبما كانو معانا يهال فما رحنا الاماكن التاريخية والمتاحف عشان ما يتضايقون منا وهم بالاساس ما يفهون وايد فخلينا أغلب وقتنا في المولات والأماكن العامة وهم يمشون معانا ههههه ،،
ومن هنــــآآ سيبقى كل ذكرى أنطبع في ذاكرتي ،،،
أول مـــآ وصلنا المطار كان الجو معاهم مطر بصراحه شي خيـــآآلي ومطارهم وآآيد حبيته مرتب ومنظم ،، طبعا نحن وقفنا لين ما راحو يخلصون لنا الفيزا ( الفيزا تسونه في المطار ) ،،
أول ليلة في بــآكوو
مقتطفات من بــآكو الجميلة ،،
أول مول دخلناه حاولت أجيب الأسم ما عرفت شو أسم المول بس اللي أعرفه انه ع البحر ^_^
غروب الشمس ومنظر الغروب في باكو
اسطورة أذربيجان التي لا تنطفئ (جبل النار)
مركز حيدر علييف Heydar Aliyev Center هو أحد المراكز الثقافية المشهورة عالمياً من اهم معالم باكو ،،، ما دخلنا هالمركز بس نزلنا صوبه وصورنا ^_^
ذكريات قوبـــآآ ،، طبعا في قوبـــآآ فيه ثلوج وأسم الفندق اللي سكنا فيه ريكسوس قوبا أذربيجان الفندق وايد حلو هالصور من برع الفندق ،، وفي بالي أكتب لكم تدوينة ثانية بيكون عن الاماكن وتقيمي على المكان والمطاعم ،،
مقتطفات من shahdag ( شاهداغ) ،، المكان السياحي اللي يبي يتزلج بالثلج ويركب الترفليك يروح هالمنطقة ويبعد عن قوبا تقريبا مال ساعه أو أقل وأحلى شي عجبني فيه أن فيه أماكن لليهال ويقدرون يلعبون هناك بس بكم ما أعرف *_* المكان حلو ومرتب بس زحمه وايد ^_^
فوق الجبل ( ^_^ ) بس من نزلت ما حسيت بأصابع ايدي من البرودة *_*
روحنا الشلالات أفوردزي كان متجمد من الثلج وما كان فيه ناس وما أستانسنا فيه بس المناظر كان وايد حلو ( سبحانك ربي ما أعظمك ) حتى الماي كان متجمد من البروده *_*
أخر الأيام في باكو
أذربيجان جميلة بس اليوم أكتب لكم التدوينة عشان أتذكر الأماكن اللي روحته أستكشفت أن في وايد أماكن ما روحنا له ^_^
الصور كله من كاميرا الفون في كم صورة تقريبا من الكاميرا لان وايد برد ما قدرت أيود الكاميرا وايد *_^
الحمدلله رب العالمين وسافرنا ورجعنا وغيرنا جو
الحمدلله الذي بنعمته تتم الصالحات .
سبحان الله وبحمده
أشوفكم في تدوينات جديدة باذن الله تعالى
فمان الله
 " ...){kind=link}