يوم للذكرى : تخرج أخوي آخر العنقود

 

السلام عليكم ورحمة الله وبركاته

يسعد الله أوقاتكم بكل خير وبركة وطاعة الله تعالى

" اللهم صل وسلم وبارك على نبينا وحبيبنا وشفيعنا محمدا عليه أفضل الصلاة وأزكى التسليم "

ويا مرحبابكم مع تدوينة يديدة وذكرى يديدة 

هو تخرج أخوي حبيبي أخر العنقود

سبحان الله .. لو أكتب لكم قصة أخوي بـ تحسونه شوي غريب بس

الواحد ما يقول الا الحمدلله رب العالمين .. لان هذا قدر ومكتوب ونصيبه في هالدنيا

أخوي هذا يوم فترة الامتحانات الثانوية توفى عمي رحمه الله تعالى وأسكنه فسيح جناته

وتعرفون العزاء وربشه العزاء وامتحانات الثانوية ما يقدر يعيده الا بدور ثاني 

وتيسرت آموره ونجح الحمدلله ودخل الجامعه و وقف الجامعه

لين ما جاء كرونا هنــآ تغير نص الشعب اللي كمل دراسه واللي سو له بزنس ..... آلخ

هذا أخوي شو سوى راح سجل في الكليه ودرس ومحد كان يعرف انه يدرس لين ما وصل تقريبا الدبلوم العالي لان

الدراسه صار أون لاين وعقب فتحو الدراسه وصار حضوري عشان كذا الاغلبيه عرفو انه يدرس 

وسبحان الله مرت الايام ووصل البكالوريوس 

ويوم آخر فصل حقه في الكليه ووقت الامتحانات توفى أبوي رحمه الله وأسكنه فسيح جناته

وتعرفون النفسية كيف كانت مندمره والحمدلله على كل حال من الأحوال

فـ تحول امتحاناته للدور الثاني والحمدلله رب العالمين 

توفق فيه ونجح وعقبال يا رب ما يتوظف ونفرح بـ توظيفه في هالسنه يا رب العالمين

العبره من هذا كله .. هو الرزق والنصيب متى ما الله سبحانه وتعالى كاتب لك الدراسه بتدرس

ومتى ما الله سبحانه وتعالى كاتب لك الرزق بـ يرزقك 

كل شي رزق ونصيب 

الواحد ما يقول غير الحمدلله على كل حال من الاحوال 

الحمدلله فوق كل شعور

الموهيم الحينه بخليكم مع بعض الصور اللي صورته للذكرى

(( أول محطه مرينا وخذينا لنا عصاير وانا طبعا لازم اخذلي ايس كريم ))

عقب رحنا محل الورق نغلف الهدية حقه وناخذ له ورد

بطاقة الحضور للحلفة

قاعة الحلفة

بصراحه استمتعت وايد لاني بالفعل اشتفت احضر حفلات وانشطه

يمكن اخر حفله حضرته قبل كرونا 

والله يرزق اخوي ويرزق جميع الباحثين عن العمل بوظيفة قريبه

اللهم آمين يا رب العالمين

ختاما :

اللهم اغفر لأبوي وارحمه، وعافه واعف عنه، وأكرم نزله، ووسع مدخله، واغسله بالماء والثلج والبرد، ونقه من الخطايا كما ينقى الثوب الأبيض من الدنس، وأبدله دارا خيرا من داره، وأهلا خيرا من أهله، وزوجا خيرا من زوجه، وأدخله الجنة، وأعذه من عذاب القبر، ومن عذاب النار وأرزقه الجنة بغير حساب يا رب العالمين 

ولا تنسوني من دعواتكم الطيبة

لا تنسون

ضيفوني سناب دايما انزل مواضيع حلوة وخفيفة وشويه من يومياتي البسيطة

سبحان الله وبحمده

سبحان الله العظيم

فمان الله