لمــــــآآذا أودن ...؟؟؟

لماذا أدون ..؟؟

اليوم أبي ارمس شــوي ،، أبي افضفض شــوي ،، أبي أقول لكم كل اللي فـ خــآطري ... عشــآن اخبركم ليش أنــآ أحب اكتب .. وأحب أدون .. ببدء وبخبركم كل شي في بـآالي ،،

أنــآ كنت حــآلي من حــآل أي بنت ،، مــآ عندي معلومـه كــآفيه .. أو أفكــآر أو أي شي .. كنت أدخل النت صح .. واقرا مواضيع بس مــآ يتعلق فيني أنــآ كـ أنثي اقرا مواضيع عــآمه وكنت مسجله فـ منتدى عروس بس ادخل بين فترة وفترة يعني الفترة اللي ادخله يكون طويلة شووي بالنسبه لـي ...

وكل بنــآت عمي اذا سالتهم شي يضحكون علي وأنــآ اسكت واطنش لان ما يهمني .. بس فوق هذا كله كنت احب شي اسمه تنسيق وهم يعجبهم تنسيقاتي وايام نطلع السوق مع بعض ونشتري نفس بعض ،، لين مــآ مرت الايام ،، وسبحان الله ما صرنا نيلس مع بعض مثل أول .. وانا خلصت اول بداية دراستي الجامعيه وصار عندي فرااغ في الوقت .. وبديت ادش النت بشكل اكثر من قبل صح اني كنت مدمنه تدوينــآت .. وكانت تدويناتي عاديه في منتدى من المنتديات مثل هالتدوينات :

أيـــآم كنت أكتب شي خاص في يومي .. وأيــآم اتفرفر في مدونات الناس والطش شي عجبني خخخخخ بس عشان ازيد المشاركات اللي عندي ( لووووول )

وسبحان الله ،، مرت الأيـــآم .. ورجعت لمنتدى عروس ،، ويلست فيه يلسه واستفدت منه وايد اشياء .. وصــرت اعتني بروحي وصرت احب استكشف واشووف واشتري واجرب ،، حبيت هــذا ،، ومــآ حبيت هذا ،، هذا ناسبني ،، وهذا مــآ ناسبني ،، وصار عندي هوسه تعلم + شراء ،، ومن شفت البنات اللي فـ المنتدى مـآ شاء الله عليهم متعاونــآت زاد هالشي والحب فيني .. وصرت اكتب لهم أي شي استفيد منه ،، صرت اتعلم واجرب بس عشان افيد غيري .. مــآ عشــآن شي أو زياده متابعين أو أي شي .. بس أبي البنات يتعلمون نحن فـ هالحياه عشان نتعلم ونستفيد مــآ عشــآن نحقد أو نحسد حــد .. ( الله يعطي والله يــآخذ والله كريم ) وبالشكر تدوم النعم ... ( اللهم لك الحمد والشكر ) .. وعلى فكرة أكثر موضوع يشدني المواضيع اللي أشوف العضوة كاتبتنه بنفسها ومنسقتنه بنفسها مب كوبي وبيست وخلاص ..

ومع تطور التكنولوجيا ،، صار المنتدى محد يدخله الا نــآدرا وكل حد عنده ظروف ،، وانتشر الانستغرام والحينه السناب جــآت .. وأنــآ عن نفسي ادمنت الانستغرام وخاصه الاكاونت اللي يهتم بالجمال والمشتريات وصرت احب بس اجرب واجرب واشتري واخسر بيزاتي ومصروفي على أشياء صار فـ كبدي منهم الخلطات =( ومرة تذكرت شفت خلطه وقت لازم اجربهــآ ومن جربتها وليتني مــآ جربتهـــآ طلعت لي حبه ومن بعض هالحبه صار مكانه بقعه غامقه وما راضيه تروح .. وقلت تووبه اجرب شي من الانستغرام .. وجربت كم خطله وما حبيتها وقلت بودر هالعاده فيني بالفعل الحينه قايله برجع لخطاتي القديمة اللي مجربتنه من بدايه عنايتي احلى وافر بالنسبه لي ... بس الحينه حاسه روحي ادمن مكياج يمكن مجرد هوسه فيني وانا عارفه روحي ما استخدمه وايد لاني ماحب اكون اوفر وايد ،،، وفي مرة بعد شفت تونر قلت بشتريه بيناسبني واشتريته وطاح فـ جبدي لين يومي هذا .. بس خلاااص قايله تووبه اشتري أي شي لووول .. ( الحمدلله )

انزين الحينه أخبركم ليش أنــآ أدون ...

عن أنس بن مالك رضي الله عنه خادم رسول الله صلى الله عليه وسلم قال : ( لايؤمن أحدكم حتى يحب لأخيه ما يحب لنفسه ) ، رواه البخاري و مسلم

أنــآ أحب ادون أي شي احبه واستفدت منه بس عشان افيد غيري ..

أحب اساعد البنات اللي مــآ يعرفون شي أو يهتمون بروحهم ..

أحب اساعد البنات اللي معاي فالجامعه افهمهم اعطيهم شي مهم ورقة استفدت منه .. صدقوني بتحسون بشي فـ داخلكم .. غير غير ..

اذا استفدتي من شي عطي اللي محتاجه شي لا تتكابرين او تحقدين عليها ترى الدنيا مــآ تسوى وكلنا راحلون

لا تنسونــآ من دعواتكم الطيبه

وربي يوفقكم فـ حياتكم

ولكم بالمثل بكل دعاء تدعونه لي بظهر غيب

ولا تنسون ان هنــآك ملك يقول لكل دعاء ولك بالمثل

( سبحان الله وبحمده .. سبحان الله العظيم )

دمتم بحفظ الله