هلا وغلا
ومرحبابكم يا حلوات في مدونتي البسيطة
اليوم موضوعي موضع ختامي ،، موضوع فضفضة لسنه 2018
فضفضة لنفسي عشان اعرف أنــآ وين وصلت ،، هل وصلت لهدفي أو لا .. هل وصلت لشي اللي أنــآ ابغيه أو لاه
ادون مثل هالتدوينات للألهام .. عشان كل وحده تتابعني خلف هالشاشة تدرك نفسها وتطمح لتكون أفضل مني
نحن عابرون في هالدنيا ،، والدنيا ليس لنــآآ .. ما ابغي منكم سوى دعوة صادقة ترفعوها لرب السماء .. الدعاء لأخيك عن ظهر غيب مستجابة
...
سنة 2018 سنه جميله وحلوة ومرت الحمدلله رب العالمين
بحلوها ومرهــآآ ..
على رغم ثقل الايام اللي مرت سبحان الله وقال الله عزوجل في كتابه الكريم ( إن مع العسر يسرا )
سبحان الله هالاية خلوها في بالكم احفظوها رددوها في كل حين وساعه ..
.
.
.
ما في انسان في هالحياة سعيد وحزين كلنا نمر في ظروف منها الحلوة ومنها المرة .. بس بالايمان والثقة بالله سبحانه وتعالى إن الله سبحانه وتعالى بيسر الامور كلمح البصر اذا كان الامر مناسب لج ..
.
.
.
سنه 2018 قلل فيني الشغف قلت بطور من البزنس مالي بس في ظروف مرت علي وخلاني كسوله >> هذي اعتراف لـ سنه جديدة عشان اكون قوية وانجز افكار والبزنس يتطور ..
في ذكرى مستحيل أني أنساها او بنسها مع مر الأيام .. بس بدونها هناا عشان اترحم عليها كل ما مريت على صفحتي
في شهر 7 / 2018 توفقت اغلى مدرسة درستني وكانت صدمتنا بوفاتها كبيرة (( الله يرحمها ويغفرلها ويجعل مثواها الجنان ،، اللهم ارحم جميع موتانا وموتى المسلمين أجمعين )) مدرسه فتحت عينا على الدنيا والدين ،، ما كانت مدرسه فحسب كانت امنا تعلمنا اذا اخطينا ،، توجهنا اذا ضاقت بنا السبل .. الله يرحمها ويغفرلها ويجعل ملتقانا في الفردوس الاعلى من الجنة
.
.
.
اليوم يالسه أقلب دفتري البسيط ( دفتر بلانري لسنه 2018 )
أشوف شو أنجزت .. شو سويت .. شو صار في هالسنه
هل انجزت كل أهدافي ..؟؟
هل انجزت كل طموحي ..؟؟
بغيت هالسنه تكون سنة سعيدة بالنسبه لي .. الحمدلله رب العالمين .. رضيت بالسعادة اللي الله سبحانه وتعالى اعطاني اياه ووهبني اياه .. الرضى بالله سبحانه وتعالى هيه من أكبر سعاداتي وسعادة المؤمن ..
شهر 4 من 2018
غيرت نك نيمي المتعارف في زمن المنتديات بنت الديرة الى غيمة سعيدة ..
من أهدافي في هالسنه واللي طبقته بنسبه 50%
1- أتباع رجيم النقاط >>> اتبعته في رمضان والحمدلله رب العالمين اجتزته بس اذكر اني مرضت و ودرته *_^
2- أكون سعيدة ومتفائلة >>> والحمدلله رب العالمين راضية بالسعادة اللي ربي وهبني
2- شهر 9 غيرت اسم مدونتي الخاص للبزنس الى PINK STAR ( DESING & STORE)
وتحديات فشلت فيهم في سنه 2018
- أكون صحية
- اقلل اكل الشبسات
- أكتب 80 تدوينه
- الون 20 صورة
أنجازاتي في سنه 2018
-أول انجاز وانجح انجاز سويته هو تقديمي لـ دورة ثيمات
كنت فيها سعيدة ،، كلام البنات شجعوني عليه أكثر باذن الله تعالى بسوي دورات أكثر في سنه 2019 بحول الله
- حضرت دورات تدريبية يخصص تخصصي واكتسبت فيه خبرة
- قريت كتاب دستور الانثى و اتكيت الروح
- سويت بلانر لبعض الاشياء اللي ممكن يفيدكم مثل ما فادني تحصلونه في ليبل planner
- صممت استكيرات للبلانر
- صمتت تقويم للبلانر 2019
- سويت توزيعات لاختي + حرمة اخوي .. هالاشياء اعتبره انجاز بالنسبه لي ..
- انجاز بالنسبه لي اني سويت كب كوكيز وكان مرة لذيذ + وسويت كوكيز وكان لذيذ
- من انجازاتي هو تصميم شعار للبزنس
- واكبر انجاز انا اعتبره انجاز لي هو اضافة الانستغرام في مدونتي .. >>> هالشي تقريبا من 2017 انا اريد اسويه بس ما كان يضبط والحمدلله رب العالمين ضبط معاي
- أول طلب لي من موقع ايهيرب ..
- صممت دفتر بلانري بنفسي ..
في أشياء فشلت فيهم وعندي رغبه وارادة اني انجزة في 2019 باذن الله تعالى مثل
- الرسم على لوحة الكانفس بالجليتر
- الطباعه على الشموع
قراراتي في 2019
- السنابات يكون مفيده ومتنوعه
- اثبت كل السنابات المفيدة في بوست في الانستغرام
- انجز اكثر من 2018
- اطور من البزنس للافضل بحول الله تعالى
- احضر دورات في مجالات كثيرة
- اقدم دورات اكثر من 2018
- اتعلم على برنامج الاليستور
- احضر دورات اون لاين
- أكتب تدوينات مفيدة و أكثر من 2018
- اقرا كتب اكثر
- أطور مدونتي
- أسوي دروس للكمبيوتر
- افتح قناه في اليوتيوب
- ابدع في التصوير اكثر
امنياتي في سنة 2019
- أول أمنية أتمناها في حياتي ( ربي يطول بعمر أغلى ناسي أبوي وأمي وأخواني وربي يعطيهم الف صحة وعافية يا رب )
- اتوظف واستقر في حياتي
- اروح العمرة واعتمر ( ربي يكتب لي بعمرة قريبة ولكل من قال آمين )
أستودعتكم الله الذي لا تضيع ودائعه
فمان الله
