اي هيرب وطريقة الطلب وشوية فضفضة بخصوص الشحن

السلام عليكم ورحمة الله وبركاته

يسعد الله أوقاتكم بكل خير وبركة وطاعة الله تعالى

|| اللهم صل وسلم على رسول الله ||

@@ بسم الله الذي لا يضر مع أسمه شي في الأرض ولا في السماء وهو السميع العليم @@

مرحباا يا حلوات

في هالتدوينة بخبركم عن موقع ايهيرب ،، وطريقة الطلب وافضل خيار للشحن وتجربتي مع شحن DHL

موقع  اي هيرب 

هو من المواقع الجميلة للتسوق اون لاين وهو موقع تسوق امريكي ،، ويعتبر من اكبر مواقع الشراء عبر الانترنت وهو البوابة التسوقيه للمنتجات الصحية العضوية والطبيعية الاصلية الخاليه من الكيماويات مثل الفيتامينات والمكملات الغذائية وجميع أنواع الاعشاب ومنتجات مضادة للاكسدة والديتوكس ومستحضرات التجميل والطبخ ومنتجات العناية بالاطفال وسبب تسميته بـ Iherb كلمة مستمدة من الاعشاب والحلو في هالموقع ان عندهم كود خصم .. يخلونه لج اول ما تفتحي الصفحة .. واغلب المدونات العربيه عندهم كود خصم خاص فيهم .. اذا كنتي تتابعين بعض من المدونات الخليجية او العربية شوفي الكود اللي بين فترة وفترة يخلونه في حساباتهم وضيفيها على مشترياتج

الحينه نيي لطريقة فتح حساب في موقع ايهيرب 

الطريقة مرة مرة سهل ما يبيلها اي شي ..

ندخل على موقع ايهيرب

https://www.iherb.com/

نروح عند حسابي ونختار انشاء حساب

بيطلع لنا صفحة انشاء الحساب

ندخل الايميل وكلمة المرور مرتين ونخلي تك على الخانات اللي تحت ،، ونضغط على أنشاء حساب

ملاحظة : 

بشرط ان الاكاونت يكون بـ Gmail لاني انا حاولت افتح بـ Hotmail ما صار فـ اضطريت افتح أكاونتي بـ Gmail ،،

طريقة الطلب من ايهرب .. 

نختار المنتج بعدها على طول أضف الى السلة ..

اذا حابين تعرفون تفاصيل اكثر عن المنتج اضغطو على المنتج

 مثلا : أنا أخترت هالمنتج 

Aura Cacia, حمام الرغوة للتهدئة، عطر اللافندر، 2.5 أوقية (70.9 غم)

نروح تحت بنحصل كل التفاصيل للمنتج من الوصف وطريقة الاستخدام والمكونات والتحذيرات 

وبتحصلون تحت تصييم و صور الزبائن اللي طالبين من عندهم وهل عجبهم المنتج او لاا ؟؟

واذا حابين تشوفون تجارب أكثر دورو في عمي قوقل ما يقول لاا ^_^

وخلصنا الطلب نيي على الدفع وطريقة الدفع .. طبعا نحن في عمان عندنا الدفع بالفيزا بعكس الدول الثانية وهذا الشي اللي مسهل علينا امور الطلب من النت ( الحمدلله )

بعد ما خلصنا وتصفحنا واشترينا نروح على السلة ونضغط عليه وبيطلع لنا ملخص طلبناا

( أنا اهني اخترت طلبات عشوائية وانا ما اريدهم بس هدفي اني اعلمكم الطريقة ^_^)

وشوفو الصورة وضحت لكم بعض النقاط ..

الحينه نيي لطريقة الشحن ..

انا يوم طلبت ما كان ظاهرلي الشحن DHL الثاني اللي مكتوب عليه ان بيسلموه للبريد المحلي ^_^ 

بس كان ظاهرلي الشحن عن طريق DHL , USP , 

Globalmail DHL اللي هو الشحن المحلي

وكل ما اطلب الشحن المحلي يطلع لي الشحن أغلى من DHL فراسلت موقع ايهيرب عشان هالنقطة وقلت لهم هو شحن محلي المفروض يكون ارخص بس للاسف اشوفه اغلى من DHL فجاوبهم كان مقنع لي .

والنقطة الثانية في الشحن المحلي كل ما ازيد المنتجات كان يزيد السعر وبعدين اختفى لان الوزن صار زيادة عن المفترض ( نفس الصورة اللي موضح فوق *_* )

فاخترت طريقة الشحن عن طريق DHL

والشحن كان سعره جدا مناسب بس رسوم الجمارك كان وايد مبالغ فيه ،، هذي صندوقي الصغير كلفني الرسوم حقه 8.300 ريال .. ومنتجاتي جدا بسيطة ،، فاذا حبيتي تطلبي ،، شوفي اللي حولج اذا يبون شي خبريهم عشان تشاركون مع بعض رسوم الشحن + الجمارك اذا بتطلون عن طريق DHL

بعد ما تختاري الشحن ،، نيي الحينه لطريقة الدفع ،، مثل ما قلت لكم فوق ان نحن بطاقة البنك مالنا فيه نظام الفيزا .. الدفع خلوه عن طريق الفيزا ..

انا اخترت شحن عن طريق DHL  ،، وحطولي مسج ان بيجمعون الرسوم الجمركية والضرائب عند التسليم 

بعدين نضغط على تابع الدفع 

عبو بياناتكم نفس ما موضحه في الصورة

ملاحظة || بالنسبة لرمز البريد ،، كل ولايه لها رمز بريد خاص فيهاا مثل صحار رمزها البريدي 311 ،، شوفو رمز البريد التابعه للولاية اللي انتي ساكنه فيها واكتبيه في الرمز البريدي

بعدين اضغطو على متابعه 

بعدين عبو بعض البيانات من بطاقة البنك نفس ما موضحه لكم في الصورة

 بصراحة نسيت اخر خطوة شو هوو بس اللي اتذكره انه خلااص هذا هو اهم الخطوات اللي لازم تسونه قبل الطلب 

سوى من موقع ايهيرب او اي موقع ثاني 

طريقة تتبع الطلب 

المهم بعد الطلب بيطرشون ايميل على تتبع الطلب وين وصل و وين سار ومتى بتستلمي الطلبية ..

انا يوم طلبت كان في 23/11 والسبت والاحد كان الويكند مالهم فردو علي على يوم الاثنين والاثنين اللي بعدها انا مستلمه الطلبية 

المهم اضغطو على رقم التتبع اللي بيوصلكم اياه على الايميل وبتشوفون وين الطلبية 

هذا مثال تتبع طلبيتي وين راح و وين طار لوول

حبيت هالحركة من الموقع اللون يكون رمادي من يخلص المرحله يتحول للاخضر *_* << ما يى في بالي اني اصوره لكم من البداية ^_^

الحلو فيهم من تستلمي الطلبية بعد كم يوم يطرشون لج ايميل هل المنتجات واصله لج سليمه او في شي مكسور ..

حبيت الطلب من الموقع وسهوله والمنتجات اللي اخذته من عندهم وباذن الله ما بيكون اخر طلب من عندهم .. وفي تدوينة ثانيه بعرض لكم مشترياتي البسيطة من اي هيرب 

فكونو بالقرب

ختام التدوينة 

لا تنسون ذكر الله

|| سبحان الله وبحمده || 

استودعتكم الله الذي لا تضيع ودائعه

فمان الله