طريقة الطلب من شي ان ،،،

 السلام عليكم ورحمة الله وبركاته

يسعد الله أوقاتكم بكل خير وبركة وطاعة الله تعالى

" اللهم صل وسلم على نبينا وحبيبنا وشفيعنا محمدا عليه أفضل الصلاة وأزكى التسليم "

ويا هلا ومرحبابكم في تدوينة يديدة من تدويناتي ،،

واللي خاطرها تطلب من شي ان وما تعرف اشلون تطلب اقراي التدوينة لين تحت 

وان شاء الله من بعد هالتدوينة بتعرفين تطلبين من شي ان بدون وسيطة وبتكونين وسيطة نفسج 

وكالعادة 😀 قبل ما ادخل واكتب اي تدوينه لازم اتفلسف شووي عن خاطري

يوم كتبت ونزلت تدوينة لطريقة الطلب من ايهيرب ما توقعت في يوم ان هالتدوينة بيكون من التدوينات الاكثر مشاهدة 

وما توقعت في يوم حد بيي وبيسال اسئلة عن ايهيرب واشلون طلبتي وكيف الشحن والجمارك .. على الرغم ان كان ف خاطري

اجمع الاسئلة اللي وصلي من اسئلة ايهيرب .. بس للاسف الخاص معاي فل واذكر اني كبشرت كم سوال اذا حصلته برجع لموضوع اسئلة ايهيرب 😃

الموهيم في هالتدوينة 

بعلمكم بطريقة الطلب من شي ان واشلون تطلبون من شي ويوصل لكم الطلب لين باب البيت عن طريق شركة ارامكس

اليوم بيكون من الموقع وفي تدوينه ثانية باذن الله تعالى عن طريق الابليكشين 

وبسم الله نبدا 

اول شي ندخل على موقع شي ان من هنــــآآآآ 

عقب من وين صورة الشخص نضغط عليه وعقب نختار تسجيل ...

بيظهر لكم هالصفحة

اذا اول مرة بتسجلين ف الموقع اكتبي ايميلج واكتبي الباسورد ( اكتبي اي باسورد ما لازم باسورد ايميلج )

وفي التفضيلات حطي تك على شو اهتماماتج وشو تبين 

من تسجلون بيظهر لكم هالترحيب *_* 

الحينه نغير العملة الى العملة العمانية

ونضغط على الكرة الارضيه ونختار العملة 

والحينه خلونا نتسوق مع بعض .. 

نختار شو حابين نتسوق انا اخترت احذية وحقائب

بيظهر لكم وايد منتجات حتى تحتارين شو تختارين وشو تبين 😆😆

مثال اخترت هالبوك اضغط عليه .. بيظهر لنا الصفحة وشو فيه من الالوان وشكله من الداخل وتفاصيل اكثر عنه

ومثال ثاني اخترت هالشوز والتفاصيل ف الصورة

اذا بتختارون شوز خذو قياسكم لا تزيدون ولا تنقصون بشي 

************

طبعا في حاجة مهمه حبيت انبهكم عليه

يكون الشحن مجاني اذا تعدى 34 ريال ... والاسعار يختلف في بعض الاحيانا

مثلا انا كبشرت هالصفحة وكان الشحن مجاني في حدود 20.500 ريال 

الموهيم 

اذا حابين تطلبون ملابس خذو قياساتكم لا تزيدون ولا تنقصون اذا تلبسين ميديم خذي ميديم واذا تلبسين لارج خذي لارج

عن تجربه شخصيه اول مرة طلبت خذيت ضعف اللي البسه وتوهقت فيه 😌😌 والمرة الثانية خذيت على قياسي وطلع اوكي 😄😄

نيي الحينه لطريقة الدفع 

طبعا يقبلون كاش ويقبلون فيزا ... اختاري الشي اللي يريحج ... بس انا افضل فيزا وبخبركم ليش في النهاية ..؟؟ 

الموهم بعد ما خصنا الشوبينق نضغط على اتمام الشراء ...

والحينه نعبي البيانات المطلوبة نفس اللي وضحته لكم في الصورة

ملاحظة || بالنسبة لرمز البريد ،، كل ولايه لها رمز بريد خاص فيهاا مثل صحار رمزها البريدي 311 ،، شوفو رمز البريد التابعه للولاية اللي انتي ساكنه فيها واكتبيه في الرمز البريدي

عقب اضغطو على حفظ عشان ينحفظ بيناتكم

************

والحينه نختار طريقة الشحن

عندكم الدفع عن الاستلام

والدفع بالفيزا

والدفع ب paypal

انا بصراحه ما ياني دفعت ب paypal كل طلبات اون لاين يكون بالفيزا

المهم خلوني اخبركم ليش افضل الدفع بالفيزا في شي ان 

لان يوم تدفعين بالفيزا يكون فيه خصم .. بـ عكس الدفع عند الاستلام يكون المبلغ زياده

وهذا خبرتني عنه وحده كانت طالبه من شي ان وقالت من استلمته دفعت مبلغ محترم عليه يعني حوالي 70 ريال على شو ما اقدر اقولكم لاني ما جربت

وقريت كم كومانت وايدو على سالفه الدفع عن الاستلام يكون المبلغ زياده 

الموهيم انج تختاري اي طريقة دفع يريحج 

اذا بتدفعون بالفيزا عبو البيانات نفس اللي موضحه لكم في الصورة

ومن بيسحبو المبلغ بيوصل لكم مسج من البنك ان انسحب المبلغ

وبيطرشو لكم ايميل على ايميلكم عشان الطلبية

عقب نزلو برنامج ارامكس وشوفو وين طلبيتكم و وين واصل و وين طار ...

هذا هو شكل البرنامج تحصلونه في الابل استور 

الموهم من بيوصل الطلبية شركة ارامكس بيطرشون لكم مسج ..

اول مرة طلبت فيه من شي ان كان بداية ازمة كرونا وطرشت اخوي يستلم طلبيتي من موقعهم وكان الرسوم ريالين 

والطلبية الثانية وصلي لين باب البيت ودفعت الرسوم الريالين وكان قبل الضريبة .. والحينه مع الضريبة ما اعرف كم الرسوم ان شاء الله

اذا طلبت مرة ثانية بخبركم بالرسوم إذا شاء الله تعالى

واخيرا وليس اخرا

اتمنى اني قدرت اوصل لكم طريقة الطلب من شي ان

اذا عندكم اي استفسار كلموني على الانستا 

ولا تنسوني من دعواتكم الطيبة 

استودعتكم الله الذي لا تضيع ودائعه

" سبحان الله وبحمده "

فمان الله