طريقتي في تهيئة البشرة قبل وضع الماسك + تجربتي مع الطين الاوربي

السلام عليكم ورحمة الله وبركاته

يسعد الله أوقاتكم بكل خير وسعادة ورضى رب العباد

" اللهم صل وسلم على نبينا محمدا وعلى اله وصحبه ومن تبعه بأحسان إلى يوم الدين "

تدوينة اليوم بيكون عن طريقتي في تهيئة البشرة قبل وضع الماسك + تجربتي مع الطين الاوربي

وبسم الله نبدا 

أول شي حبيت اعرفكم على 

الادوات الاساسية اللي احب استخدمهم عند وضع الماسك

* اسبون صغير ( من سنين على اسبون باسكن روبنز )

* فرشاءة لتوزيع الماسك ( خلو لكم فرشاءه صغير خاص لتوزيع الماسك )

* فرشاءة لتقشير البشرة قبل وضع الماسك ( أحب فرشاءة دايسو ناعمه لبشرة الويهه )

* اسفنجه عشان اشيل الماسك ( اسفنجه نزيه يفوز عندي باحلى اسفنجة جربته )

*****

طريقتي في تهيئة البشرة قبل وضع الماسك

أول شي اغسل ويهي بغسول مناسب لبشرتي ،، ( بين فترة وفترة أحب أغير من الغسول ) عشان بشرتي ما يتعود على نوع واحد من الغسول

بعدين أخذ شويه من المقشر واخليه على بشرتي ،، مقشر سانت ايفرز ما استغني عنه ،، من سنين استخدمه ومستحيل اغيره ،،

والمقشر على ويهي استخدم الفرشاه وبحركة دائرية على كامل بشرتي ،، عشان المسامات تتفتح قبل ما اخلي الماسك

( هالفرشاءة أخذته من دايسوو ) فرشاه دايسو وايد حلو وناعمه خاصه لبشرة الويهه

وبعدين أغسل ويهي بالماي وابدا اخلي الماسك 

وهالمرة بخبركم عن ماسك الطين الأوربي وتجربتي مع هالماسك

************

 ماسك الطين الاوربي اخذته من ايهيرب وسبق وخبرتكم عن مشترياتي من ايهيرب

اللي حابه تطل على التدوينه من ( هنـــآآ ) رابط الماسك بتحصلونه في تدوينة المشتريات

طين الماسك الاوربي وفوائده 

* يصغر المسامات 

* ينعم ويصفي البشرة 

* يعمل على امتصاص الدهون والترسبات المتراكمه على البشرة

* يصفي البشرة من الروؤس البيضاء والسوداء

* يفتح البشرة 

هذا شكل الطين الاوربي من الداخل ،،

اشلون استخدمه 

استخدامي حق الماسك الطين الاوربي بس أضيف ماي ورد  ،،

تاخذين ملعقه صغيرة من الطين الاوربي 

وملعقتين من ماي الورد 

ونخلطهم مع بعض حتى يتماسكو 

ونخليه على بشرة نظيفه من 10 دقايق الى ربع ساعه

تجربتي مع الماسك

من احلى الماسكات اللي جربتهم في الفترة الاخيرة

بعد ما استخدمه بشرتي تتفتح ويصير فيه حيوية

هل انصح فيه ؟؟

هيه لاصحاب البشرة الدهنيه وايد بيحبوه لان يشيل كل الدهون والترسبات على البشرة وينظف المسامات من الداخل 

في ختام التدوينه 

لا تنسوني من دعواتكم الطيبه

اشوفكم على خير في تدوينات يديدة باذن الله تعالى

" سبحان الله وبحمده "