بلانري الجاهز لسنة 2017 ،، وتحميل البلانر الجاهز ...

يا هلا ومرحبـــآآ

ويسعد الله أوقاتكم بكل وقت وكل يوم

ويومكم سعيد وملي بكل الخير بأذن الله تعالى

وأوقاتكم جميلة وملي بالأنجاز

\

/

\

/

خلوني أخبركم عن بلانري وكيف بديت فيه وشو أنجزت هالسنة بفضل الله سبحانه وتعالى ...

قبل مــــآ أحمل بلانر جـــآهز وأسويلي دفتر خاص للبلانر ... كـــآن عندي بلانر عـــآدي خبركم اللي يوزعونه الشركــآت والبنوك لووول ... وكنت أكتب فيه شو أسوي في اليوم بس مـــآ كنت أتقيد .. لان بالاساس الدفتر ما يشجع وكنت أكتب في ملاحظــآت بسيطة وأحيـــآنا شو أبي أسوي ... بس التقييد بالنسبة لي كــــآن 5%

و مرة كنت يالسه على النت وقلت ادور عن البلانر شي بسيط يمكن يفيدني أغير من نفسي أو بالاحرى أنظم وقتي ... ولين مـــآ جمعت أنــآ شووو أبغي بالضبط مكــــآآن واحد ،،،

ونفذته في نهاية شهر 2 ،، عشــــآن أبدء للبلانر في بداية شهر 3/2017 ،، وانتظم وقتي بنسبة 85% تقريبا والشهر أو الأسبوع اللي ما ايود فيه البلانر وقتي يروح هبا بدون أنجاز لشي أو أي هدف في حياتي .. أمـــآ الشهر أول الأسبوع اللي ايود فيه البلانر انجز فيه وايد اشياء .. ويومي يكون فيه شي مفيد أنـــآ أنجزت فيه شي مفيد واضافه يديدة لحياتي ،،

وفي موضوع طرحته قبل فترة على مدونتي بعنوان ( تصميمي ثيم للبلانر + تحميل السكرابز) بتشوفون صورة لدفتر اللي أنــآ أخترته لسنة 2017

وهالتدوينة ومثل مـــآ خبرتكم من قبل أني بنزل لكم البلانر الجاهز اللي انـــآ أنجزته في سنة 2017 ،، واي وحده حابه تطبق البلانر الجاهز لسنة 2018 باذن الله تعالى لازم تبدء من الحينة ،، عشان تشوف شو تبغي وشو ما تبغي ،، وتقرا وتتعمق أكثر لتجهز البلانر الجاهز ،، وطبعا في تاجرات يبيعون بلانر وفي مواقع تبيع البلانر بس انــآ ما ياني وطلبت من عندهم فاحتمال كبير اني أطلبه في السنوات القادمة باذن الله تعالى .

هنـــآ أنـــآ بخبركم نبذه عن البلانر الجاهز اللي جمعته من النت .. وفي نهاية التدوينة بحط لكم رابط للتحميل .. وفي بلانر انــآ مسوتنه بروحي بعد كلهم بخليه لرابط التحميل في نهاية التدوينة ..

ومن ناحية الطباعه أختاري مقاس الدفتر يا أن يكون بمقاس A5  أو A4 على حسب نوعية الدفتر اللي أنتي أخذتيه للبلانر وبنزل لكم التدوينة ثانية وبخبركم طريقة كيف تطبعون البلانر على حجم الاوراق ان شاء الله تعالى .

طبعاا نصيحة مني كـ بلوقر وأخت طبقي البلانر صدقيني وقتج بينتظم ،، بتنجزين شي ،، وما ياخذ منج شي بتحسين براحة ومتعه في حياتج ،، بيكون لحياتج هدف تسعين له بس أهم شي يكون عندج إدارة لوقتج ،،

اعترف لكم بشي اللي هو التلفون .. التلفون هو اللي يسرق الوقت منـــآ بدون ما ندري ،، يالسين نتصفح الفون وننسى ونتكاسل نحن شو نبغي نسوي في هاليوم .. حاولي تبتعدي عن شي اسمه تلفون وتابعي الناس اللي تحسين انهم يلهمونج بشي مفيد في حياتج ،، عشان تغيرين نفسج للاحسن ...

أعترف لكم بشي سويته في بلانري 2017 ،، اللي هو أني وايد غلطت في اشياء ،، خاصه الترتيب بس أن شاء الله بلانر 2018 بصلح الاخطار اللي سويته باذن الله تعالى ... وهالتدوينة بخبركم في الاشياء اللي تحطونة في بداية التدوينة للسنة كامل وبعدين الاشياء اليومية والشهريه والاسبوعية وهكذا ...

طولت شوي في الثرثرة فوق ونرجع لمحور التدوينة .. ( البلانر )

ببدء في الاشياء اللي نحطه في البداية ..

- شعاري في الحياة وأهدافي ( تعرفون بشي أني يالسه أكتب لكم هالتدوينة وشفت شو كنت كاتبه الأهدافي وطموحي إن نص أهدافي أنــآآ حققته وأنــآ مــآ دارية عنه هههه هذي نعمه من الله ( الحمدلله على كل حال من الأحوال ))

- جوانب الحياة بتحديد الأهداف اللي ابي أحققها في كل جانب من جوانب حياتي ،، الجانب الروحي ،، الجانب الثقافي ،، الجانب التعليمي وشو أبي اتعلم وشو هو هدفي من هالتعليم وهكذا ..

- قائمة المشاريع ( project to list  ) ... عبارة عن قائمة المشاريع اللي ابي انجزها مثل مشروع التصميم وشو اصمم وشو الأفكار اليديدة وهكذا ...

- الاقتباسات المفضلة .. بكتابة أقتباسات اثرت فيج ،، قريتي كتاب وعجبج فقرة أو شي أكتبيه .. عشان ترجعين له في أي وقت انتي فاضية فيه وتقرينه مرة ثانية وثالثه وهكذا ..

- قائمة الكتب اللي تبي وناوية تقرينه خلال السنة .. أكتبي اسماء الكتب عشان ما تنسين تشترينه وتقرينه .. ولا تنسي انج تحددين وقت للقراءه ..

- وصفة اليوم ،، لكتابة الوصفات اللي عجبج ،، وتبي تحتفظين بالمقادير أو الوصفات الجديدة اللي تبين تسوينة

- قائمة الامنيات ( Wish List ) ،، بكتابة امنياتج خلال السنة ( وربي يحقق لكم ضعف ما تتمنون )

- 30 أمنية قبل ما يصير عمرج 30 سنة ،، بنفس فكرة امنياتج خلال السنة بس هالورق لازم يكون معاج في فترة العشرينات عشان تعرفين شو أنجزتي في فترة العشرينات .

- أذا حابين تطبعون التقويم السنوي لسنة 2018 (من هنـــآآ) واذا حابين تضفونه في البداية على راحتكم واذا لا ما له داعي عشان في البلانر الشهر نحتاج ولازم نخلي البلانر الشهر لكل شهر ..

من نرتب البلانر خلال السنة نيي لـ بلانر الشهري ،،

1- التقويم الشهري للشهر .. مثلا شهر واحد ندور في قوقل على بلانر شهر 1/2018 ،، ونطبعه ،، وهالشي تسونه لكل شهر من شهور السنة ..

2- البلانر الشهري ،، عبارة عن مربعات ونكتب فيه كل الأشياء اللي نبي نطبقة خلال الشهر من كل النواحي ،،

3- 30 يوم للتحدي ،، لازم تحددين نوع التحدي ،، مثل اسوي رياضة البطن لمدة ربع ساعه ،، هذا تحدي أنــآ اسويه خلال الشهر عشان اشوف هل أنــآ قد التحدي أو لا ،،

3- مخطط لكسب أو ترك عادة ( نكتب أسم العادة ) ،، مثلا أبي يكون من عادتي أني أقرا الرقية الشريعه يوميـــآآ ،، بعدين أنتي بتتاقلمي على هالعادة ،، دوري على عادات حلوة وطبقيها في السنة ،،

4-   … My Business planner اذا عندج بزنس اطبعي هالبلانر اذا لا طوفيهــــآ ،، عبارة عن الاشياء اللي تبي تسويها خلال الشهر وشو بتشتري لانجاز المهمه والطلبات خلال الشهر والأفكار اللي في بالج تطبقينه وبعض الملاحظات لاماكن الشراء ..

5- Do it  ،، عبارة عن انجازاتج خلال الشهر ،،

6- أنجازات الشهر والأشياء اللي ما حققته والظروف اللي مريت فيه خلال الشهر .. لكتابة كل الأنجازات اللي خططته وشو الظروف اللي مريت فيها في حال أني ما طبقت التخطيط

7- بلانر لتتبع المصروف ،، بتحديد المصروف الشهري وقائمة الاشياء اللي أبي اشتريهــآآ .

والحينة نيي ل بـلانر أسبوعي و يومي ،،

أسبوعي .. 

1- تحديد أهداف الأسبوع والأماكن اللي ابي اروحها خلال الاسبوع والاشخاص اللي ابي اكلمهم أو أشوفهم والأشياء المهمة اللي لازم أنجزه خلال الاسبوع

2- أذا كنتي بلوقر اصبعي هالصفحة ( صفحة لتخطيط لكتابة المدونة ) .

3- قائمة To do it  ،، لكتابة انجازات الاسبوع .. و why don't do  ،، ولين ما انجزت الاهداف المحدد في الاسبوع ..

4- بلانر الماي ،، عشان تشوفين وتراقبين روحج هل تشربين ماي بالقدر الكافي أو لا ،، هالبلانر انصح فيه بقوة لازم يكون عندكم عشان التحفيز لشرب الماي بكثرة .

5- بلانر لحفظ القرآن الكريم ،، بتحديد الأيات وبعدها تكرار الآيــــآآت

6- بلانر لحفظ مفردات الأنجليزي ..

بلانر يومي

-     Daily Planner... تحتاجينة أول شي من تطبيق البلانر بس عشان تعرفين قيمة الوقت بعدين بتحسين روحج بالتغيير ،، بالفعل ممتع هالبلانر ..

- وبلانر شفته الحينة وعجبني عشان اطبقة على السنة اليديدة باذن الله تعالى My List for today ،، عبارة عن قائمة المهامات لليوم من تنظيف وترتيب ويوم للروقان وهكذا ،، للتحميل بتحصلونه في المجلد

هذا بلانري الجاهز كان لسنة 2017   للتحميل البلانر كــآمل  ( من هنــــآآ )

وهذا المجلد في بعض من البلانر للتحميل ( من هنـــآآ )

وبلانر أسبوعي بديزاين ثاني للتحميل ( من هنــــآآ )

التدوينة اليايه بحط لكم كيف تطبعون من الورد أو بي دي أف ،،، عشان تحدوون حجم الورق .. 

أستودعتكم الله الذي لا تضيع ودائعه

سبحان الله وبحمده .. سبحان الله العظيم

فمان الله