29 منتج خلصته ،، هل برجع أشتريه أو لا ..؟؟

هلا وغلا ومرحبااا

" اللهم صل وسلم على نبينا محمد وعلى اله وصحبه ومن تبعه بأحسان إلى يوم الدين"

" اللهم صل وسلم على نبينا محمد"

" بسم الله الذي لا يضر مع أسمه شي في الأرض ولا في السماء وهو السميع العليم"

.

.

.

تدوينه اليوم من التدوينات الحلوة اللي دوم أكبتهاا ،، منتجات خلصتها هل برجع اشتريه أو لا ..؟؟

لمشاهده مواضيع المنتجات اللي مخلصتنهم من قبل رايي وتقييمي للمنتجات 

منتجات خلصته رايي وتقييمي || Products have been saved. My opinion and evaluation

تجاربي مع 13 منتج خلصته هل برجع أشترية أو لا

ريفييو لــ ( 16 منتج ) خلصته هل برجع أشتريه أو لا ،، رأيي وتقيمي للمنتجات

هالمرة تاخرت في تصوير المنتجات لين ما طحت على كميه حلوة للمنتجات اللي خلصتهم بعافيه 

( الحمدلله )

بسم الله نبدا مع أول منتج

سكراب سانت ايفز  بالمشمش .. هالسكراب من أحلى المقشرات اللي استخدمه من سنيين ..

يشيل الجلد الميت ويخلي البشرة ناعمه وطريه .. يستخدم للجسم والويهه 

انصحكم فيه وبقوة .. 

طبعا سانت ايفز طورو منتجاتهم وصار عندهم مقشرات ثانيه بعدني ما جربت ولا واحد فيهم

فـ أكيد برجع أخذه مرة ثانية

*********

ميني فازلين جدا عادي هالنوعيه .. كنت استخدمه لترطيب رجلي عزكم الله لا غير 

ما برجع اخذه 

****

ماسك جيجو البركانية من فيس شوب 

سبق وتكلمت عنه في تدوينه لتجربتي مع منتجات جيجو البركانيه ( هنـــآآ)

الماسك وايد وايد حلوو يشيل الروؤس السوده ويشيل الترسبات أنصحكم فيه وبقوة

فـ حاليا عندي منتجات ثانية بس فـ المستقبل فـ أكيد برجع وباخذه

*********

زبده الجسم من bomb أخذته من القرية العالميه هالزبده بالتوت ريحته حلوه ،، وفيه لمعه

اللي تحب ريحه التوت بتحبه ،، فـ ما برجع أخذه

*****

سكراب flake Away

سبق وتكمت عنه في الانستغرام ( هنــآآ ) و ( هنــآآ ))

ومن المنتجات اللي مستحيل امل منه واسميه من مفضلاتي اللي من سابع المستحيلات اغيره

ريحته يا بناات وايد وايد حلوو انصحكم تجربونه وصدقوني بتحبونه 

برجع أخذه ويمكن اخذ درزن منه لووول

*********

بلسم الشعر من ميني سو ،،

كتبت عن مشترياتي من ميني سو (هنــآ)

البسلم حلوو ،، ما ينشف الشعر ،، وريحته حلوه 

فـ اذا روحت صوب ميني سو فلازم اخذه

****

كريم القدمين من دكتور اسكن 

من الكريمات اللي عجبني وصرت ما استغني عنه ،، قلل من التشققات اللي ظهر في ريلي ،،

وفرته من متجري الصغير من (هنــآآ)

فـ انصحكم تجربونه

****

معجون الاسنان من همالايا ،، المعجون ميني ينفع حق السفر 

بصراحه المعجون وايد حلوو بكتب عنه بوست قريب في الانستــآآ 

برجع اطلبه 

****

سبري الويهه بالصبار

الفتره الاخيره لاحظت على نفسي اني وايد حبيت منتجات اللي فيهم صبار

وهالسبري وايد وايد حبيته ينعش الويهه 

بيكون على حسب مودي فـ هل برجع أخذه او لا ..؟

****

من المنتجات اللي طلبتهم اون لاين 

هالكريم للاندر رام الكريم حلوو ،، وحدلي لون الاندر رام بدرجه 

للاسف التاجر اللي كان يوفر هالكريم صار ما يوفره 

*****

كريم الويهه من بيوتي كاتلوج سبق وتكلمت عن مشترياتي من هالمحل من (هنــآ)

الكريم ب اليوجرت ،، الكريم ما ناسب بشرتي فصرت استخدمه لترطيب رقبتي ،،

فـ ما برجع اخذه

*****

كريم العروسه ..

بين فترة وفترة ارجع اشتريه احب اخلطه مع مقشراتي ،، خاصه مقشر كاب ،،

****

جل الصبار ،، قلن لكم هالفترة صرت وايد احب جل الصبار ،، وصرت استخدمه لمنطقة الاسترش ماكس

بالفعل لاحظت انه خفف لي الخطوط والحينه مخلتنه من ضمن عنايتي اليومية فانصحكم تستخدمونه

ورجعت خذيت لي 

*****

جونسن بالتوت ،، من قبل كنت وايد احب منتجات جونسن ولا زلت احبه 

جونسن بالتوت من كثر ما عجبني بسرعه خلص حتى ما حسيت فيه الا وهو مخلص لووول 

فـ برجع  أخذه

****

سكراب بالمانجو من لطافه ،، تحبون ريحه المانجو ،، انصحكم تجربونه ريحه المانجو طاغي فيه وايد حلوو

السكراب يترك البشرة رطبه ،، 

بيكون على حسب مودي فـ هل برجع أخذه او لا ..؟

****

اخر تدوينه لمنتجات خلصته (هنــآآ) كتبت عن هالمنتج الجميل واليوم في هالتدوينه برجع واكتب عن هالمنتج الجميل

عباره عن شاور جل في حبيبات ريحته حلوه وغريبه واذا حد راح تايلند لازم برجع اوصيهم ياخذونه لي 

*****

يمكن اخيس شامبو جربته من Herbal بزيت الارغان المغربي وما صدقت اني خلصته ريحته كريهه ،، وتساقط شعري بشكل فضييع ،، مشكله براند Herbal

يسون الشامبو اكس لارج لشهرين قدام ،، توهقت لين ما خلصته ،، ما انصحكم فيه ولا برجع اخذه

****

هالكريم اخذته من اذربيجان الكريم واايد حلوو ،، فيه فيتامين a & e

طبعا ما اقدر اترجم الكلام مكتوب بلغتهم .. فـ إذا الله سبحانه وتعالى كاتب لي ارجع اذربيجان فـ برجع أخذه

****

من الكريمات اللي حبيته من باث اند بودي وركس .. بالفروله ريحته عجيبه يا بنات 

برجع اخذه مرة ثانيه وثالثه ورابعه *_^

****

كريم تقشير وتفتيح الويهه بالليمون ،، كتبت عنه بوست ف الانستاا (هنــآآ) أخذته من باب التغيير 

حسيته جدا عادي ف ما برجع اخذته مرة ثانية

****

عطر الجسم من مدام كوكو ،، ريحه العطر حلوو بس مشكلته مب ثابت

فصرت ف الفترة الاخيرة ارش حجرتي بـ العطورات اللي ماخذتنه من مدام كوكو

(هنـــآآ) تدوينه مشترياتي من مدام كوكو فـ ما برجع أخذه

****

من كثر ما أجرب زيت اللوز الحلو من براندات ثانية بصراحه والصراحه يقال ان زيت اللوز الحلو من ناو

من احلى الزيوت اللي استخدمتهم ومستحيل اغيره 

لمشاهده تدوينه فوائد الزيوت من (هنــآآ)

ولطلب المنتج من متجري الصغير من (هنــآآ)

****

جل مائي من نيتروجينا ،، الجل وايد حلوو ،، استفدت من اكثر يوم ياني جفاف ف الويهه 

فانصحكم فيه للجفاف فـ برجع اخذه 

****

بيبي فيس ،، المنتج فلبيني ،، استخدمه عشان اشيل طبقات الجلد الميت 

بيبي فيس انا ما استخدمته لويهي فـ اتمنى انكم تكونو حذرين في هالنقطة 

فبرجع أخذه

****

من العطور الحلوة واللي ينشال في الجنطة وما ياخذ مساحه العطور فرنسيه ثباته خفيف 

ينفع للتوزيعات ،، اللي حابه تطلبه من (هنـــآآ) 

****

كريم لازاله الشعر من فيت ،، كنت من زمان استخدمه و ودرته ورجعت استخدمه 

لي طريقة خاصه لاستخدامه ،، فـ أحسن شي أكتبه لكم تدوينه عشان تستفيدون منه 

****

بلاك ماسك ،، من الانواع اللي مستحيل افرط فيه ،، يشيل الروؤس السوداه والمسامات والترسبات

طريقتي في الاستخدام (هنــآآ) ف برجع اوصيهم يجبون لي من هالماسك العجيب

****

معطر الجو من glade

ريحته فانيلا ،، فـ ما برجع اخذه لاني احب التغيير 

****

غسول الويهه من dr.c.tuna

بـ شجره الشاي ،، الغسول حلوو فـ كنت عبالي لون الغسول بيكون أخضر

بس تفاجات انه لونه ابيض ،، الغسول حلوو ،، فـ يمكن ارجع اخذه على حسب 

أدري التدوينه شوي طويل

فـ أتمنى انكم تستفيدو منه

في ختام تدوينه اليوم

لا تنسوني من دعواتكم الطيبه

استودعتكم الله الذي لا تضيع ودائعه

فمان الله 

" سبحان الله وبحمده "